बाँके, फागुन २१ गते । सीमाक्षेत्रमा व्यवसाय गर्ने व्यापारीले नेपालमा भारतीय रुपियाँको सहजताका लागि आग्रह गरेका छन् । व्यवसायीले बजारमा भारतीय नोटको अभाव हुँदा नेपाली र भारतीय व्यापारी र उपभोक्ता दुबैलाई हैरानी भएको बताएका छन् ।
नेपालगञ्जको सीमावर्ती रुपैडिया बजार व्यापार मण्डलका महासचिव रजा इमाम रिजवीले नेपालमा भारतीय नोटको अभाव हुँदा ब्यवसाय गर्न गाह्रो भएको बताउनुभयो । ग्राहकलाई भारतीय नोट नै देउमात्र भन्न नसकेको उहाँले बताउनुभयो । नेपाली लिएर आउनेलाई भारतीय चाहियो भन्दा नेपालीलाई नै समस्या हुन्छ, उहाँले भन्नुभयो ।
भारतीय रुपियाँको अभाव भएपछि व्यापारी पहाडी जिल्लामै पुगेर भारतीय रुपियाँ सङ्कलनमा जुटेका छन् । नेपालगन्जमा रहेका सटही काउन्टरलाई नेपाल राष्ट्र बैङ्कले दैनिक ४० हजार मात्र भारतीय रुपियाँ दिने गरेका कारण बजारमा भारुनोटको अभाव भएको व्यवसायी बताउँछन् । दैनिक १० लाखको माग हुन्छ, राष्ट्र बैङ्कले ४० हजार रुपियाँ मात्रै दिन्छ नेपालगन्जको धम्बोझीमा सटही काउन्टर सञ्चालक लबिन घिमिरेले भन्नुभयो- बजारमा भारु नोटको त हाहाकार नै छ ।
सटही काउन्टरमा भारु नोट पाइन छाडेपछि अन्य ब्यवसाय गर्नेहरूले पनि भारु सटहीको काम थालेका छन् । नेपालगन्जमा १२ वटा सटही काउन्टर रहेका छन् । व्यापारीले मोलमोलाई गरेर भारु रुपियाँ दिने गरेका छन् । एक सय भारतीय रुपियाँ नेपाली १७० रुपियाँसम्ममा पनि सटही गर्नुपरेको पीडितहरू बताउँछन् । नेपालगन्जमा भारु नोटको अभाव भएपछि नेपालगन्जका केही व्यापारीहरू भारु रुपियाँ सङ्कलनका लागि सुर्खेत, दाङ्गलगायत अन्य पहाडी जिल्ला पुगेको भारु सटही सञ्चालकहरू बताउँछन् । पहाडी जिल्लामा पुगेका व्यापारीले एकमुष्ट भारु सङ्कलन गरेर नेपालगन्जबाट कारोबार गरिरहेको स्रोतले जनाएको छ । नेपालगन्जमा मात्र नभई सीमावर्ती भारतीय बजार रुपैडियाका व्यापारीहरूले समेत नेपालीबाट महँगो कमिसन लिने गरेका छन् । नेपालबाट भारत रोजगारी तथा औषधि उपचार र अन्य सामान किनमेलका लागि जानेहरूसँग उनीहरूले भारतीय रुपियाँ साटी दिएबापत कमिसन लिने गरेका छन् ।
-Gorkhapatra
